Cuzziannu cuziannu

Cozze

“LE COZZE DI GIOVANNI VARISCO”
------------


CUZZIANNU CUZZIANNU

Niuri comu la pici
cu la porta a vanedda
d’unni s’affaccianu
comu principissi
vistuti russu curaddu.

‘Nzocch’è ca cci mittisti!
cocu di gran talentu
pueta di cucina
ca cu trasi ccà
nesci cu la panza china.

‘Un è un cumplimentu
ma divina viritati
Variscu sì’ lu Re
lu Re di li pignati.

Bagheria, 13.01.07

Jttata d’accussì senza pritisi
all’amicu Variscu
ca ‘un talia spisi.

Giovanni Mannino e Michelangelo Di Lorenzo

Vina di ouitari

Canterano

VINA DI PUITARI

La vina di puitari
mi vinni a tarda ura
quannu già la menti
‘un riggìa cchiù curuna

Li versi ca mi vennu
scriviri l’haju allura
prima ca la menti
di bottu l’abbannuna.

Pi lu pueta
ca ‘un havi pinna ‘n manu
cci voli un ciriveddu
quantu un cantaranu.

Vi portu un paraguni:
“Lu sceccu
ca di ciriveddu abbunna
l’aviti mai vistu
cu la pinna ‘n manu” ?

Lu purrettu

Porro o verruca

LU PURRETTU

Avia un purrettu
‘nta la mascidda dritta
ca ogni vota ca lu livav
iddu puntualmenti rispuntava.
Un ghiornu mi vinni ‘nta la menti
di ricuvirarimi di prescia a lu spitali
pi farimi la plastica facciali.

Lu dutturi ca mi visitò mi dissi:
“Chistu è nenti”!
Haju a fari lu ‘nnestu
cu la tò stessa peddi.
Ma ‘un mi dissi
d’unni l’avia a pigghiari
sta biniditta peddi.

‘Nta lu mumentu
ca m’avia a tagghiari
mi ‘ntisi tuccari lu darreri.
P’istintu mi rintisi
spustannu lu darreri appena avanti .
“Statti fermu”! mi dissi lu dutturi
“la peddi haju a pigghiari
pi lu ‘nnestu putiri fari”.

Ddà pi ddà fici un gran pinzari
e ‘ntra mia e mia dissi:
“Chistu mi voli ruvinari
scanciannu la me’ facci pi lu mè darreri”.

“M’havi a scusari” cci dissi a lu dutturi:
“Facissi tuttu chiddu ca voli fari
ma la facci di culu NO !
La facci di culu ‘un mi l’havi a fari”.